སྨོན་ལམ་ཚིག་མཛོད་ཆེན་མོ། ཐོན་རིམ་བཞི་པ།
འཛམ་གླིང་གི་སྐད་ཡིག་ཡོད་དོ་ཅོག་ལས་དེབ་ཕྲེང་ཆེས་མང་ཤོས་ཀྱི་བོད་ཡིག་ཚིག་མཛོད་ཆེན་མོ།
ཚིག་མཛོད་ངོ་སྤྲོད།
སྨོན་ལམ་ཚིག་མཛོད་ཆེན་མོ་ནི་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་འགན་གཙོ་བོར་བཞེས་ཏེ། ཐོག་མར་ལོ་ངོ་དགུའི་ལས་འཆར་འོག་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་ཇོ་ནང་དང་། གཡུང་དྲུང་བོན་བཅས་གཙོ་བོར་གྱུར་པའི་ཤེས་ཡོན་གྱི་ཚོགས་སྡེ་མི་འདྲ་བའི་རྩོམ་སྒྲིག་སྡེ་ཚན་ ༣༥ ཡི་རྩོམ་སྒྲིག་པ་ ༢༠༠ ལྷག་གིས་འབད་བརྩོན་ཆེན་པོས་རྩོམ་སྒྲིག་གནང་བའི་རིག་གཞུང་གི་ལས་གཞི་རྒྱ་ཆེ་བ་ཞིག་ཡིན། དེ་ཡང་ལོ་གསུམ་ཚན་དང་པོ་དང་གཉིས་པའི་ནང་ཚིག་མཛོད་ཐོན་རིམ་སྔ་རྗེས་སོ་སོར་མཉེན་ཆས་ཀྱི་ངོ་བོར་འགྲེམས་སྤེལ་བྱས་པ་དང་། ལོ་གསུམ་ཚན་མཐའ་མ་སྟེ་ཕྱི་ལོ་ ༢༠༢༢ ལོར་ཚིག་མཛོད་ཐོན་རིམ་གསུམ་པ་དེབ་གཟུགས་སུ་དཔར་སྐྲུན་ཞུས་པར། ཚིག་མཛོད་དངོས་ལ་པོད་ ༡༤༨ དང་ཟུར་བཀོལ་པོད་ ༧༥ བཅས་ཁྱོན་བསྡོམས་པོད་ ༢༢༣ གྱི་བདག་ཉིད་དུ་གྲུབ་ཅིང་། དེར་ཤོག་ངོས་ ༡༣༣,༨༧༠ ལྷག་དང་། མ་ཚིག་ ༣༩༥,༠༠༠། དཔེར་བརྗོད་ ༢༤༠,༨༨༤ བཅས་ཁྱོན་ཚེག་བར་ ༦༤,༦༦༣,༡༢༡ ལྷག་གིས་གྲུབ་ཡོད་པས། འདི་ནི་ད་ལྟའི་བར་འཛམ་གླིང་གི་དེབ་ཕྲེང་ཆེས་མང་བའི་ཚིག་མཛོད་ཐོག་མར་ཆགས་ཡོད། ༢༠༢༢ ལོའི་ཟླ་ ༥ ཚེས་ ༢༧ ཉིན་སྨོན་ལམ་ཚིག་མཛོད་ཆེན་མོ་དེ་ཉིད་དྲ་ལམ་ཚིག་མཛོད་ཀྱི་ངོ་བོར་ཡོངས་ཁྱབ་ཏུ་འགྲེམས་སྤེལ་བྱས་པ་དང་། ཕྱི་ལོ་ ༢༠༢༥ ཟླ་ ༡༡ ཚེས་ ༠༣ ཉིན་ iOS དང་ Android མ་ལག་སོ་སོར་བཀོལ་ཆོག་པའི་ཁ་པར་མཉེན་ཆས་གསར་བསྐྲུན་གྱིས་རིན་མེད་འགྲེམས་སྤེལ་བྱས། ད་ལྟའང་མུ་མཐུད་དུ་སྔར་ལྟར་རྩོམ་སྒྲིག་ཞུ་དག་དང་འཕྲི་སྣོན་ལེགས་བཅོས་བྱས་དང་བྱེད་མུས་ཡིན་ལ། གསར་དུ་འཕྲི་སྣོན་བསྐྱར་བཅོས་གང་བྱས་པ་རྣམས་དུས་ནས་དུས་སུ་གསར་བསྒྱུར་བྱེད་བཞིན་ཡོད།
ཁྱད་ཆོས་གཙོ་བོ།
གཞུང་ལུགས་ལ་མཐུན་པ།
མ་ཚིག་དང་འགྲེལ་བཤད་ཚད་གཞི་སོགས་ཚིག་མཛོད་རིག་པའི་སྤྱི་སྒྲོམ་དང་མཐུན་པར་བསྒྲིགས་པ།
བརྗོད་གཞི་སྣ་འཛོམས།
བོད་ཀྱི་ཆོས་བརྒྱུད་སོ་སོའི་ལྟ་གྲུབ་ཁག་གཙོ་བོར་བྱས་པའི་ལོ་རྒྱུས་བཟོ་གསོ་སྙན་ངག་སོགས་བརྗོད་གཞི་སྣ་མང་བ།
བཀོལ་སྤྱོད་སྟབས་བདེ།
གློག་ཀླད་དང་ཁ་པར་གང་དུའང་བཀོལ་སྤྱོད་སྟབས་བདེ་བའི་དྲ་ཚིགས་དང་མཉེན་ཆས་གཉིས་ལྡན་ཡིན་པ།
དུས་བསྟུན་ཡར་རྒྱས།
མ་ཚིག་དང་འགྲེལ་བཤད་ཁག་ལ་ཞུ་དག་དང་བཟོ་བཅོས་ཀྱིས་དུས་ནས་དུས་སུ་ཡར་རྒྱས་གཏོང་བཞིན་པ།
དཔྱད་གཞི་ཁུངས་ལྡན།
མ་ཚིག་གི་འགྲེལ་བཤད་རྣམས་དཔྱད་གཞི་ཚད་ཐུབ་ཀྱི་ཡིག་ཆ་གང་ལ་གཞི་བཅོལ་བའི་ཁུངས་གསལ་བ།
དེང་རབས་དང་མཐུན་པ།
ཚིག་མཛོད་ཀྱི་སྤྱི་སྒྲོམ་དང་བཟོ་བཀོད་སོགས་དེང་རབས་བརྡ་འཕྲིན་ལག་རྩལ་གྱི་འགྲོས་དང་མཐུན་པ།
གཞུང་ལུགས་དང་ལག་ལེན་ཟུང་འབྲེལ།
ཚིག་མཛོད་ཀྱི་སྤྱི་སྒྲོམ་སྒྲིག་པའི་སྐབས། ཐོག་མར་མ་ཚིག་འཚོལ་སྡུད་དང་གཏན་འབེབས་བྱས་ཤིང་། དེ་ནས་འགྲེལ་བཤད་ཀྱི་ཚད་གཞི་གཏན་ལ་ཕབ་སྟེ། བརྡ་སྤྲོད་དང་བརྡ་ཆད་ཀྱི་དབྱེ་བ་ཞིབ་ཏུ་དགར། ད་དུང་། རྒྱུན་སྤྱོད་ངོས་འཛིན་གྱི་རྟགས་དང་སྤྱོད་སྒོ། ལྡོག་ཚིག་དང་འདྲ་ཚིག ཉེ་ཚིག་དང་བསྡུས་ཚིག མིང་གི་རྣམ་གྲངས་དང་འབྱུང་ཁུངས། དཔེ་རིས་དང་དཔེ་བརྗོད། ཟུར་མཆན་ཇི་ལྟར་འདེབས་ཚུལ་གྱི་རྣམ་གཞག་བཅས་ཚིག་མཛོད་ཀྱི་སྤྱི་སྒྲོམ་ཧྲིལ་པོ་གཞུང་ལུགས་དང་ལག་ལེན་ཟུང་འབྲེལ་གྱི་སྒོ་ནས་གཏན་ལ་ཕབ་ཡོད།
ཚིག་མཛོད་རིག་པའི་སྤྱི་སྒྲོམ།
དབྱིན་བོད་ཕྱོགས་བསྡུས།
ཚིག་མཛོད་ཆེན་མོའི་དྲ་ཚིགས་དང་མཉེན་ཆས་གཉིས་ཀར་བོད་ཡིག་རྐྱང་པའི་ཚིག་མཛོད་ལས་གཞན་དབྱིན་བོད་དང་བོད་དབྱིན་ཤན་སྦྱར་གྱི་ཚིག་མཛོད་དུ་མ་ཕྱོགས་བསྡུས་ཀྱིས་བོད་དབྱིན་གྱི་ཐ་སྙད་ཕན་ཚུན་གཞི་གཅིག་ཏུ་འཚོལ་བཤེར་ཐུབ་པའི་ཁྱད་ཆོས་ཀྱང་གསར་སྣོན་བྱས་ཡོད།
བོད་ཡིག་ཚིག་མཛོད་ཀྱི་གྲུབ་ཆ།
